Non mi meraviglierebbe affatto se un politico, non avendo altri argomenti per tassare, non si inventerebbe quella sul sesso, e chissà?
|
Procopio Cinturella deputato
‘e nu partito detto del progresso,
pe’ scarrecà’ d’’e diebbete ‘stu Stato,
penza e pprupòne ‘a tassa ‘ncopp’’o sesso.
Procopio dice:”Abbasta nu senzore,
localizzato addò nasce ‘o piacere;
‘na specie ‘e microchip,sissignore,
ca scatta cu’ ll’impulso d’’o penziero”
“Cu’’stu bbellu sistema so’ ssicuro
ca poco ‘e lloro nun ‘a pavarranno;
sicuramente sarrann’’e ccriature
e cchi ha tuccato appena ‘e nuvant’anne.”
“Pe’ cchi s’arrangia ‘a tassa ‘a pava ‘o stesso,
pure si è ssulo e ‘o ffà cu’ ffantasìa
ma chi nun vò’ restà’ ddoje vòte fesso,
ca se cercasse quacche ccumpagnìa.”
“Pe’ ll’evasore so’ ddulure ‘e panza,
e mmo ve dico che ssuccedarrà;
pe’ ppena nce starrà ‘na vecchia ausanza…
‘A castrazione o ‘a cint’’e castità.”
A ‘sti pparole scoppia ll’ ira ‘e Dio,
pe’’stu pruggetto strano e disumano;
se sente pure quacche murmurìo,
pe’ ddint’’e corridoie d’’o Vaticano.
|
|
