VECCHIA PISCATRICE

Generalmente ll’omme è cacciatore,
si pure ‘e tiempe d’ogge è ccosa rara,
ma comm’ a ssempe se sente ‘o rummore,
quann’’o fucile piglia ‘a mira e spara.

‘A femmena è cchiù ffurba,è maliziosa,
se dice ch’è ‘na bbòna piscatrice;
‘a pesca pe’ natura è silenziosa,
ne sape quacche ccosa ‘onna Beatrice.

‘O pomeriggio ‘e quase tutt’’e juorne,
cu’ Rita e Barbarella fa ruciello;
parla libberamente e ssenza scuorno,
cuntanno pilo pilo tutt’’e zzelle.

Dice ca ‘a pesca piace a ttant’’e lloro,
nce sta chi ‘o ffa pe’ sfizio e ppe’ priezza;
e cchelle ca so’ ttutt’aneme e ccòre,
nun vanno cu ’na canna ma cu ‘a rezza.

“Io vott’’a rezza, e tu?” Fa Barbarella
Dice Beatrice:”Io mo so’ strutta e stracqua…”
Po’ lle risponne cu ’na resatela.
“N’haggiu piscato pisce, ma sott’ acqua”.