‘A DIFFERENZA ‘E CLASSE

Se presentaje nu juorno ‘nnanze ‘a porta
addò nce steve ‘e casa nu ‘ngigniere,
nu puveriello,n’omme senza sciorta,
ca pe’ ccampà faceva ‘o funtaniere.

“Trasite, s’è appilato ‘o gabbinetto”
Dicette ll’ ingegnere Fonterosa.
Nu tubbo d’omme dint’ a’’na giacchetta,
cu ‘a pippa ‘mmocca se sparava ‘a pòsa.

“Io nun ‘o vvoglio fa, me sporco ‘e mmane,
pecché pe’ mme chest’è ‘na fessarìa”
‘O funtaniere fa recchie ‘e campane,
astregne ‘e diente e ddice: “Così sia”.

E qquanta vòte cu ssanta pacienza
ha mazzecato chesti ddoje parole;
è ppuveriello sì, ma tène ‘a scienza
‘e chi ‘mmiezz’ a’’na via n’ ha fatto scole.

“Poi dicono che siamo tutti uguali”
Fa ll’ingegniere ‘e bbotto, e se ne fotte
si chesta frase è ‘na vrancata ‘e sale
pe’ cchi sta ‘nterra, chi se trova ‘a sotto.

“ ‘Ngigné scusate...” Dice ‘o funtaniere
“...Haggio fernuto ‘e reparà ‘stu guasto.
Va bene, sì, vuje site nu ‘ngigniere,
ma ‘a scola ca tenite nun abbasta”.

“Vuje me parlate ‘e differenza ‘e classe
e mmesurate tutto cu rraggione.
Io so’ nu pover’omme,stongo a spasso...
Pe’’stu lavoro voglio nu melione”.