E’ MUORTO....
“Sapite niente? E’ muorto don Giacchino...”
‘Na voce.Po’ s’arruvutaje ‘o quartiere.
Se presentaje pe’ pprimma Giusuppina
pe’ ddà curaggio a’ povera mugliera.
Teneva ll’uocchie apierte e ‘a vocca storta;
‘e mmane ca stregnevano ‘e llenzole.
Ma spisso e vvulentieri,’nnanze ‘a morta
se parla senza cuntrullà ‘e pparole.
“Gesù! Ma chillo steve accussì bbello!”
Dicette a bbella posta Giusuppina
E ppe’ ddà nu sullievo a Lucianella...
“Però pare ca dorme don Giacchino”.
“Mo se ne gghiuto,m’ha lascviata sola,
‘sta vita mia sarrà sulo nu chianto”.
E Giusuppina cu nu chiappo a’ gola...
Ma che brav’omme, era proprio nu santo”.
“Mo nun so’ niente,so’ ‘na derelitta...”
Se repigliaje e ddicette bell’ e bbuono...
“Primm’’e murì,sapite che m’ha ditto?
Giusuppina ha pavat’’o pesone?”