‘A SCIORTA ‘E DON NICOLA

'Sti vierze ca me scorrono d’’a penna,
nun vonno spurcà ‘a carta,certamente,
ve vonno dà sultanto quacche accenno
‘e chi cu ‘a mmedicina accide ‘a ggente.

A ssittant’anne ‘o povero Nicola
pe’ ssentere ‘o cunziglio ‘e quacche amico,
jette addù nu duttore ‘a part’’e Nola.
Chello ca succedette...Mo v’’o ddico.

‘Stu pover’ omme ancora chin’’e vita,
ca a cchell’età faceva ancora ‘e zzompe;
maje nu dulore ‘e capa,maje n’artrite,
maje niente...Maje ‘na purga,maje ‘na pompa.

Pe’ nu dulore fitto dint’’e cianche
se presentaje Nicola addò duttore,
‘na scienza sott’ a nu cammese janco;
‘o rre d’’e luminarie,un professore.

“Diciteme nu poco che tenite”
Dicette ‘o prufessore al buon paziente.
“Nu duluriello fitto dint’’a vita,
duttò’ che mme dicite,è ccos’’e niente?”

“Sento nu poco ‘o fecato ‘ngrussato,
è ccos’’e niente,nun avé paura;
venenno ccà si stato furtunato,
vattenne ‘a casa e ppigliate ‘sta cura.”

Quanta serenghe,pinoli e supposte,
quanta lavagge avette don Nicola;
dint’ a’ nu mese se mettette a pposto,
zompe nun ne fa cchiù,pecché mo vola.

Vola liggiero comme nu canario
pe’ mmezz’’e tutte chelli mmedicine;
mo don Nicola grazie al luminario,
sta a’’o campusanto, sott’ a nu lumino.