Napule sott'e 'Ncoppa

Ossia, Napoli vista nei suoi difetti, nei suoi pregi, nei suoi momenti comici, nei suoi momenti tragici e infine sempre con un pizzico di amore e di speranza.

‘A MOSTRA D’’O SEICIENTO

Scritto da Antonio Ruggiero on .

I

Dint’’a Reggia ‘e Capemonte
nce sta ‘a mostra d’’o seiciento,
arte ca maje cchiù tramonta...
Chella ‘e mo,pare va a vviento.

‘Mmiez’ a ttanta,tanta gente
ca è curruta p’’a guarda,
me so’’ntiso leggermente
‘ncopp’’e spalle tuzzulià.

Fatto strano! Mo v’’o ddico...
N’omme ‘e tantu tiempo fa,
dice ‘e bbotto:”So’ n’amico,
fermate, nun t’aggità.

“Ma chi è,che vva truvanno?”
Cerco ‘e nce capì quaccosa,
quanno chillo sussurranno,
se presenta:”Sono Rosa”.

Me so’’ntiso a ll’intrasatto
friddo,friddo dint’ a ll’ossa,
me so’ vvisto pe’ nu tratto
cu nu père dint’’a fossa.

II

“Proprio io,Salvator Rosa,
no,nun te meraviglià;
una firma assaie famosa,
pirciò nun t’’a può scurdà”.

“M’ allicordo e ssissignore,
scusa si te guardo stuorto,
è,ca nun nce credo ancora
si si’ vvivo o si si’ muorto”.

“Chesti ccà so’ ffessarie,
damme ‘a mano,nun tremmà;
llà nce sta ‘na cumpagnìa
ca nun pò maje cchiù pittà”.

“Sono artisti d’’o’ ppassato,
so’ ttanta celebbrità;
hanno tutte ‘mmurtalato
cu ‘o penniello ‘sta città”.

M’ha purtato ‘int’’a ‘na sala
chiena ‘e tele,tele janche.
Pe’ vvedè s’era reale,
me so’ pizzecato ‘e cianche.


III

‘E ttenevo tutte attuorno,
cierte annanze e cierte areto,
quase me mettevo scuorno
e lle dì ch’ero pueta.

Me pareva ch’er’io ‘o muorto,
ch’ero oggetto ‘e ll’ al di là,
ma pe’ nun me fa nu tuorto,
Rosa dice:”Eccoli qua”.

“Te presento a Cavallino,
Mattìa Preti e Battistiello;
tre pittori del Divino,
tre maestri d’’o penniello”.

“Ccà nce sta Luca Giordano,
il pio Ciccio e lo Spadaro.
hanno dato un volto umano
a ‘sta terra bella e amara”.

“Nce sta Ruoppolo,Stanzione,
Spagnoletto e Peppe Recco;
‘mmiezz’ a Conca ed a Falcone,
nce sta pure il buon Pacecco”.

IV

“Delegato ‘e chist’artiste,
‘na domanda t’haggia fa...
‘E cubbiste,’e surrealiste,
ma che ffanno pe’ pittà?”

“Niente pe’ pparé normale;
quatte botte,quatte ‘nguacchie,
e si vuò sapè che vvale...
va tre ssische e nu pernacchio”.

‘Na resata,pò cchiù niente,
dint’ a cchelli qquatte mura.
‘Ncopp’’e ttele d’’o seiciento,
risplennetteno ‘e culure.

Chistu fascini ‘e ‘na vòta
m’ha jucato ‘stu scherzetto,
forz’ è bbuono ca ll’annoto,
primma ca perde ll’effetto.

Sissignori,artisti muti
di quell’epoca che fu;
‘a pittura s’è evoluta...
Nun capimme niente cchiù.

e-max.it: your social media marketing partner