'O CUNGRESSO D''E MACCARUNE

‘O Cannellone,’o rre d’’e mmaccarune,
nu juorno decidette ‘e fa ‘o cungresso,
pe’ accuntentà ‘a richiesta ‘e quaccheduno,
ma certamente,sulo p’’o fa fesso.

Se ritruvajeno ‘nnanze ‘o caudarone,
nu zito,nu fusillo e nu mezzano.
“Muviteve!” Alluccava ‘o cannellone
a cchi s’avvicinava chianu chiano.

‘O paccaro cu ‘o gnocco e ‘o maltagliato,
ognuno se purtava nu papiello,
pe’ ddicere quaccosa ‘int’’a jurnata,
lascianno aret’ a’’e spalle ‘o vermiciello.

E qquanno ognuno ‘e lloro pigliaje posto,
d’’o cannellone avetteno ll’ invito.
Scattaje nu maccarone:”Na pruposta...”
“Stateve zitte ca mo parla ‘o zito”.

Proprio a ccentro d’’o gruppo,bello gruosso,
‘o zito accumminciaje: “So’ quarant’anne...”
Ma da sinistra cu nu colpo ‘e tosse:--
“So’ quarant’anne,sì,ca nce staje ‘nganno!”

“Nun era meglio ll’ebbreca ‘e ‘na vota...”
Se permettette ‘e dì ‘o fusillo ‘e bbotto.
“Vint’anne nc’he’ tenuto dint’’a lota,
pirciò pe’ mme può ffa pur’’o fagotto”.

Dicette ‘o paccaro scattanno all’erta.
“E’ overo !” Lle dicette pronto ‘o gnocco.
“T’’o ddico pecchè io pure haggiu sufferto
‘o tiempo ca tu nce appilaste ‘a vocca”.

“Ma statte zitto tu, famme ‘o favore...”
Dicette ‘o vermiciello un poco offeso.
“Nun vide ca nun tiene cchiù ssapore?
Te si abbuffato e ttiene ‘a panza appesa?”

“So’ sciupatiello, vì’ quanto so’ ssicco?
Sto ssempe ‘mmiezz’ a vvuje, ma sto ddijuno,
pecché tengo nu preggio,nun allicco,
nun faccio ‘a catenella cu nisciuno”.

Nu tubbettiello senza dì permesso,
trasette a llintrasatto ‘mmiezz’ a lloro.
“Nun so’ nu maccarone e mmanco fesso,
ma mo sentite a mme primma ca mòro”.

“Vuje ca facite tanto ‘o tiremmolla,
dicite ma che vvò’, ma che nce azzecca;
ma si ‘int’’o caudarone ll’acqua volle,
vvullenno va a ffernì ca po’ se secca.”

“Chist’è ssulo nu lampo...Attiente ‘o tuono!
V’’o ddice ‘o delegato ‘e chella pasta
ca,quanno cresce dint’’o caudarone,
nun nce sta maccarone pe’ ddì bbasta”.