NU FILOSOFO ‘E PASSAGGIO

Sentite a mme , ca songo assaje ‘struito,
dicette nu filosofo ‘e passaggio,
a dduje signure,ca parlanno ‘e vita,
fernetteno pe’ ddì ch’era nu viaggio.

“ Nu viaggio è viaggio quanno saje addò viene,
e qquanno saje sicuro addò se va;
si accussì fosse,’ncopp’ a mille triene,
farrìa ‘o turista pe’ ll’ eternità “.

“ ‘A vita nosta è tale e qquale a ll’ onna,
ca ‘o viento dispettuso ‘a votta areto;
‘a vita ,no, nun è mmanco nu suonno...
Nu suonno è ppe’ cchi dorme e ppo’ se sceta”.

“ Che v’ haggia dì, mannaggia a mme mannaggia,
ca nuje simme ll’ effetto ‘e nu mistero;
io v’haggia dì cu ttutto ca so’ ssaggio,
ca proprio pe’ ‘stu fatto, è bbella overo”.

“ E’ ccomme cchella femmena scurnosa
ca s’annasconne ‘a faccia sott’’o velo,
lasciannece cu ll’ anema ‘nzeriosa
sperdute ‘ncopp’’a Terra e ssott’’o cielo”.

“ Sentite a mme, nun ‘a currite appriesso,
tant’ essa è ‘nzista, nun se fa acchiappà;
v’’o ddice nu filosofo, nu fesso,
c’ha perzo ‘a capa e ‘o suonno p’’a vasà”.