Una fiamma che si spegne e un'altra che si accende. Una poesia d'amore dal tono elegiaco.
|
Nu viecchio prufessore’e pianefforte
s’è mmiso ‘o fracche ‘e ll’urdemo cuncerto;
vedenne n’ombra nera,se n’è accorto,
ca s’avvicina lenta e a bbraccia aperte.
‘A fenestella affaccia dint’’o vico,
addò dduje còre sott’ a nu lampione,
se ‘ncantano pe’ nu mutivo antico,
sentenne ‘e nnote carreche ‘e passione.
E ttanta nce ne mette ‘o prufessore,
ca po’ peffino ll’ombra ca ‘o ceréa,
annanze a ttanta forza e a ttant’ ammore,
pur’essa se sta ferma e se ‘ntalléa.
Suspire e vvase ‘e duje nnammuratielle
ca so’ ffelice e stanno còre a ccòre;
nun sanno ca dint’ a ‘stu vicariello,
nu viecchio prufessore sòna e mmòre.
Ll’urdema nota tremma dint’ a ll’aria,
ma ‘e duje guagliune nun nce fanno caso,
ca n’ombra nera nera e sulitaria,
s’abbraccia ‘o prufessore e ppo’ s’’o vasa.
|
|
