MANA A MMANA CU’’O NONNO

Nun saccio si po’ a vvuje v’è ccapitato
‘e guardà a mmare fin’ a ll’orizzonte,
‘ncopp’ a ‘na spiaggia meza svacantata,
quanno se stenne ‘o rrusso d’’o tramonto.

Tutt’è tranquillo,tutt’è cchiù liggiero,
pe’ ffino chella varchetella a vvela,
ca sciulia lèggia comm’ a nu penziero,
ca va pe’ mmare e sse ne saglie ‘ncielo.

Ll’ummeto a ll’uocchie,è ‘na malincunìa,
ch’appecundrisce doce-doce ‘o còre;
nun è n’arrivederce,ma n’addìo,
quanno nu juorno nce saluta e mmòre.

A ppochi passe ‘a me,nu criaturiello,
strignenne ‘a mana a’’o nonno,ll’addimanne...
“’Fra poco ‘o cielo sarrà chin’’e stelle.
Vurrìa sapé pecché mo nun nce stanne?”

‘O nonno dice:--“ ‘E stelle so’ llucènte,
so’ ppiezz’’e luce,so’ puntille d’oro,
ca Dio l’accocchia dint’ a nu mumento
e a ll’arba n’atu sole nasce ancora.”

Nonno e nepote se so’ alluntanate
lascianno arreto a lloro ll’armunìa,
‘ncopp’ a ‘na spiaggia meza svacantata,
ca s’è rignuta ‘e tanta fantasìa.