‘A SAGGEZZA DO’ ZERO

Dimme òi né, cu qquà’ permesso
pure tu mo vuò’ cuntà;
si’ nu zero, si’ nu fesso,
si’ ‘na vera nullità.

Io ca songo ‘o nummer’uno,
so’ ssenz’ato meglio ‘e te;
tu pe’ mme nun si’ nnisciuno,
io pozz’ essere nu Rre.

Va vattenne dice ‘o doje,
me faje pena te n’he’ j’;
sempe ‘ncuoll’ a nnuje t’appuoje,
ma ‘sta storia hadda fernì.

T’’o ddich’io ca so’ pperfetto,
cchiù pperfetto nun se pò;
dice ‘o tre: Manch’io t’accetto,
va vattenne primm’ ‘e mo.

E vva bbuono,lle fa ‘o zero,
rispunnenne a ttu ppe’ ttu;
site nummarielle è overo,
ma cu mme valite ‘e cchiù.

Senz’’e me nun ghiate niente,
( doppo ‘e vuje pe’ ccarità );
si no a ddiece oppure a cciente
nun putite maje arrivà.

Jamme nun facite ‘e scieme,
so’ nu zero c’haggia fa,
ma si nce mettimme ‘nzieme
manco Dio nce pò ffermà.