‘NCOPP’’A LIBBERTA’

Cu ‘na faccella tennera e ppulita,
dice:” Haggia fa nu tema e mm’he’’jutà;
chesta parola nun ll’haggiu capita...
Inalienabile è la libertà”.

“ E’ nu diritto ‘e ll’omme, chest’’o ssaccio,
ma inalienabile, chesta parola,
nun ‘a capisco...” Dice aizann’’e bbracce.
“...Dimane l’haggia dicere ‘int’’a scola”.

“ Chesta parola è ffiglia d’’a raggione,
inalienabile vò’ ddì ch’è ‘a toja;
chi perde ‘a libbertà, sienteme bbuono,
tira ‘a carretta a ll’ate comm’’e vuoje”.

“ Tu mo si’ ppiccerillo, si’ ‘nnucènte,
e cchesti ccose ancora nun ‘e ssaje;
si tu sapisse quanta e qquanta ggente,
chistu diritto nun l’ha avuto maje”.

“ E qquanta ggente senza cchiù ddecòro,
se scorda d’esser’omme e sse fa schiavo;
perdenno ‘a libbertà, chistu tesoro,
vennennese pe’’na magnata ‘e fave”.

‘A vita è ‘a toja, e cchesta è ttale e qquale,
nisciuno maje, guagliò’, t’’a pò llevà;
nun nce sta prezzo pe’ ddì quante vale,
inalienabile è la libertà”.